“Usamos cookies propias e de terceiros para fines estatísticos, análise de uso e medición da nosa páxina web. En ningún caso se utilizarán as cookies para recoller información de carácter persoal.”

Se continúa navegando consideramos que acepta o seu uso

Acepto

Compartir

Comezo das emisións dunha canle de TDT en ultra alta definición (4K) na cidade da Coruña

14/01/2021 – Radiotelevisión Española comezou as súas emisións de TDT en 4k na cidade da Coruña. Este novo contido de ultra alta definición emitirase pola canle radioeléctrica 21. Trátase dunha canle en probas na que Televisión Española emite programas de produción propia en ultra alta definición, tales como a serie documental de Cidades Españolas Patrimonio da Humanidade, ademais de outros contidos en 4k.

Esta emisión realizase coa modulación DVB-T2 (TDT de segunda xeración), polo que é preciso dispoñer na vivenda dun televisor preparado para o DVB-T2 para poder captar este sinal. Na actualidade, todos os televisores de última xeración(4k) dispoñibles no mercado incorporan un descodificador DVB-T2.

Ademais, cómpre sinalar que no caso de comunidades de veciños con instalación de antena colectiva tamén deberán ter instalado o módulo correspondente á canle 21.

Despois do acendido no ano 2018 da emisión para Santiago de Compostela desta canle, xa son dúas as cidades galegas na que xa está dispoñible a canle TVE 4k.

A resolución e calidade da imaxe en Ultra Alta Definición é superior á alta definición convencional, proporcionando unha maior nitidez na imaxe e unha sensación de maior calidade na percepción do usuario.

RTVE presenta a súa primeira proba piloto de emisión en 8K por TDT

20/10/2020 – RTVE realizará este mércores 21 de outubro a primeira emisión piloto a nivel mundial de sinal de televisión en Ultra Alta Definición (UHD) 8K. Santiago de Compostela será pioneira na visualización de emisións demostrativas de Televisión Dixital Terrestre coa máxima resolución dispoñible.

Para esta primeira emisión organizarase un evento semipresencial, para cumprir coas recomendacións de seguridade derivadas da situación actual de crise sanitaria debido á COVID-19. O Instituto Oficinal de RTVE proporcionará o sinal en streaming para que os asistentes poidan seguir o acto de xeito remoto.

O sinal radiarase desde a Escola Técnica Superior de Enxeñeiros de Telecomunicacións da UPM, nunha canle asignada temporalmente para a realización destas probas. Ademais, tamén se emitirá o sinal de televisión 8K desde varios centros emisores da empresa Cellnex Telecom situados en Madrid, Barcelona, Sevilla, Málaga, Zaragoza, e tamén desde o emisor situado no monte Pedroso en Santiago de Compostela. O piloto que se vai a poñer en marcha permitirá emitir e recibir un sinal de TDT en Ultra Alta Definición (8K) desde Pedroso pola canle radioeléctrica 33.

Esta proba piloto enmárcase dentro das actividades da Cátedra RTVE na Universidade Politécnica de Madrid e será posible grazas á colaboración dos membros do seu Comité Asesor Tecnolóxico, ao cal pertence a empresa galega Televés Corporación.

Mais información –

https://www.rtve.es/rtve/20201019/rtve-lidera-8k-espana/2046389.shtml

Galicia finaliza o proceso de liberación do segundo dividendo dixital

01/10/2020 – Galicia rematou hoxe os traballos técnicos para deixar libres as frecuencias incluídas no denominado segundo dividendo dixital, proceso que consiste na reorganización e desprazamento das canles de TDT a novas frecuencias, co obxectivo de deixar libre a banda de 700 MHz, na que se despregarán as futuras redes 5G.

Os centros da rede principal de televisión que se apagaron esta madrugada nas provincias de Ourense e Pontevedra estaban emitindo desde febreiro nas antigas e nas novas frecuencias de modo simultáneo, co que se garantiu o mínimo impacto na poboación.

Na provincia de Lugo os traballos xa remataron a principios deste ano, concluíndo os labores técnicos na noite do 10 ao 11 de febreiro.

Polo que respecta á Coruña, esta provincia non está afectada polos axustes derivados do segundo dividendo dixital.

A maiores tamén mudou a frecuencia de emisión do múltiple autonómico noutros 216 centros de extensión de cobertura do sinal de televisión de titularidade municipal.

A partir de hoxe, a emisión da programación da TVG será na canle 25 para Ourense e na 37 para Pontevedra. En Lugo emite na canle 31.

Máis información:

https://www.xunta.gal/notas-de-prensa/-/nova/51875/galicia-culminou-con-exito-esta-mana-proceso-liberacion-segundo-dividendo-dixital

O 30 de setembro de 2020 producirase o cesamento das emisións do sinal de televisión na banda de 700 MHz nas provincias de Ourense e Pontevedra (2)

14/09/2020 - A Secretaria de Estado de Telecomunicacións e Infraestruturas Dixitais (SETID), pertencente ao Ministerio de Asuntos Económicos e Transformación Dixital, acaba de propoñer a data 30 de setembro para apagamento das emisións de televisión da banda de 700 MHz nas áreas xeográficas de Ourense e Pontevedra.

Este apagamento é o último paso na liberación do Segundo Dividendo Dixital, proceso que consiste na reorganización e abandono dalgunhas canles nas que se está a emitir a TDT na actualidade para deixar libre a banda de 700 MHz, necesaria para os novos servizos de banda larga (5G).

Durante varios meses, mantivéronse as emisións en “simulcast” (emisións simultáneas na antiga e na nova frecuencia) co obxectivo de facilitar aos usuarios a adaptación das súas instalación para recibir as novas frecuencias planificadas.

O vindeiro día 30 de setembro producirase o cesamento das emisións das canles de televisión nas frecuencias antigas, e emitirase unicamente o sinal polas novas frecuencias.

As novas canles UHF de emisión na provincia de Ourense son as seguintes:

  • Canle 25 (MAUT): TVG, TVG2, GHD, G2HD
  • Canle 26 (MPE1): Disney Channel, Paramount Channel, Dmax, Gol

Mentres que na provincia de Pontevedra son estas:

  • Canle 24 (RGE1): TVE1, TVE1 HD, TVE2, TVE2 HD, Clan, 24H
  • Canle 37 (MAUT): TVG, TVG2, GHD, G2HD

Todos estes cambios implican que, no caso de non telo feito, sexa necesario facer unha resintonización de canles nos televisores.

As comunidades de veciños con instalación de antena colectiva afectadas que aínda non fixeran os cambios no seu equipamento deberán poñerse en contacto cun instalador de telecomunicacións rexistrado para efectuala. O custo das devanditas actuacións estará subvencionado. A contía da subvención oscila entre 104,3€ e 677,95€, en función dos cambios precisos para a adaptación. A solicitude de axudas realizarase online ata o 30 de setembro de 2020 trala realización da adaptación das instalacións de recepción do sinal da TDT. Soamente poderán solicitar axudas para as actuacións realizadas por empresas instaladoras rexistradas no Rexistro de Instaladores de Telecomunicacións do Ministerio de asuntos Económicos e Transformación Dixital.

Os cidadáns poderán consultar as súas dúbidas na páxina web http://www.televisiondigital.es/ e nos teléfonos 901 201 004 y 910 889 879.

Aprobadas as subvencións aos operadores de televisión polos costes do segundo dividendo dixital

29/07/2020 – O Consello de Ministros aprobou dous Reais Decretos que establecen as subvencións para compensar aos operadores do servizo de comunicación audiovisual televisiva polos gastos derivados da liberación do Segundo Dividendo Dixital.

A liberación do Segundo Dividendo Dixital consiste na reorganización e abandono dalgunhas canles nas que se está a emitir a TDT na actualidade para deixar libre a banda de 700 MHz, necesaria para os novos servizos de banda larga (5G). Este proceso tiña que estar rematado o 30 de xuño de 2020, pero debido a situación de excepcionalidade motivada pola pandemia do COVID-19, o día 30 de marzo de 2020, España comunicou á Unión Europea a necesidade de aprazar a devandita data. Posteriormente, estableceuse como nova data de finalización do devandito proceso o día 31 de outubro de 2021, mantendo as emisións en “simulcast” (emisións simultáneas na antiga e na nova frecuencia) ata o 30 de setembro, co obxectivo de facilitar aos usuarios a adaptación das súas instalación para recibir as novas frecuencias planificadas.

Apróbanse subvencións para os prestadores do servizo público de ámbito estatal e autonómico, que teñen o obxectivo de compensar os costes derivados da emisión simultánea e transitoria das súas canles de televisión nas frecuencias afectadas polo segundo dividendo dixital entre os días 1 de xullo de 2020 e 30 de setembro de 2020.

Por outra banda, aprobouse a concesión directa de subvencións aos prestadores privados (de ámbito estatal, autonómico ou local) por un importe máximo de 10 millóns de euros. Estas axudas están destinadas a compensar los costes derivados dos cambios a realizar nos equipos de transmisión para a súa adaptación ás novas frecuencias planificadas polo proceso de liberación do segundo dividendo dixital.

Máis información:

https://www.mineco.gob.es/portal/site/mineco/menuitem.ac30f9268750bd56a0b0240e026041a0/?vgnextoid=938c6ae35d493710VgnVCM1000001d04140aRCRD&vgnextchannel=864e154527515310VgnVCM1000001d04140aRCRD