RTVE emitirá o mundial de futbol con calidade de Utra Alta Definición (UHD)
17/11/2022: Radiotelevisión Española emitirá o mundial de fútbol de Qatar de xeito gratuíto pola TDT. As emisións realizaranse en UHD-4K con calidade HDR.
Segundo ven de anunciar a corporación, TVE emitirá preto de 20 partidos, incluídos todos os da selección española coa máxima calidade de imaxe utilizando a retransmisión 4K HDR.
Respecto á emisión da TDT en UHD, esta emisión realizase coa modulación DVB-T2 (TDT de segunda xeración), polo que é preciso dispoñer na vivenda dun televisor preparado para o DVB-T2 para poder captar este sinal. Na actualidade, todos os televisores de última xeración(4k) dispoñibles no mercado incorporan un descodificador DVB-T2.
Ademais é preciso estar dentro da zona de cobertura dalgún dos emisores desde os que TVE realiza emisións con esta tecnoloxía, o que se corresponde con aproximadamente o 60% da poboación española, segundo os datos de RTVE.
Cómpre sinalar que no caso de comunidades de veciños con instalación de antena colectiva tamén deberán ter instalado o módulo correspondente á canle de emisión.
No seguinte enlace pódense atopar as canles segundo a comunidade autónoma e a cidade na que se está a emitir. https://www.uhdspain.com/web/wp-content/uploads/2021/06/LISTADO-CANALES-TDT-UHD-SPAIN.pdf , que no caso de Galicia son as seguintes:
|
CIDADE |
CANLE |
|
A Coruña |
21 |
|
Santiago de Compostela |
33 |
|
Lugo |
37 |
|
Ourense |
33 |
|
Pontevedra |
26 |
Fonte: www.rtve.es
RTVE únese á segunda “chamada a Europa” para defender o mantemento das frecuencias de emisión do servizo de televisión dixital terrestre.
10/11/2022: Radiotelevisión Española xunto con asociacións e empresas europeas da industria da radiodifusión e da cultura, unen forzas de novo baixo o lema “Chamada a Europa” , para defender a presenza da TDT no espectro radioeléctrico.
Na actualidade a TDT utiliza a banda de frecuencias do espectro radioeléctrico que vai de 470 a 694 MHZ, espectro inferior da banda UHF, e o uso desta banda está blindada para o servizo de televisión terrestre ata o 2030. Así, durante os próximos 8 anos, a actual TDT ten garantida a súa emisión.
Non obstante, no 2023 producirase a seguinte Conferencia Mundial de Radiocomunicacións (CMR-23), na que está previsto que se debata a liberación de mais frecuencias da banda que está a utilizar a TDT para outros usos, ou mesmo a súa desaparición total.
O manifesto, presentado simultaneamente por todos os participantes europeos, incide no acceso masivo e asequible, no baixo consumo e na robustez da radiodifusión terrestre a través do espectro radioeléctrico, en caso de catástrofes naturais ou provocadas. Por outra banda, lembra que cada ano se emiten a través do espectro inferior UHF (470 – 694 MHz) millóns de eventos culturais que chegan a 80 millóns de fogares de toda Europa.
Polo que, os organismos de radiodifusión e a industria creativa fan unha chamada aos responsables da toma de decisións para que protexan a actual asignación do espectro UHF para a difusión da televisión e así que a cultura, a información, o entretemento e a educación poida seguir estando dispoñible de xeito libre e gratuíto para todos os europeos.
Fonte: www.rtve.es/rtve
A CNMC informa sobre o proxecto de Real Decreto que modificará a data de cese das emisións de televisión dixital terrestre en definición estandar.
24/10/2022 – A Comisión Nacional dos Mercados e a Competencia (CNMC ) ven de aprobar o seu informe sobre o Proxecto de Real Decreto polo que se modifica o Real Decreto 391/2019, polo que se aproba o Plan técnico nacional da Televisión Dixital Terrestre e se regulan determinados aspectos para a liberación do segundo dividendo dixital.
En dito informe a CNMC aproba a modificación da data de cese das emisións da televisión dixital terrestre en definición estándar, fixada inicialmente para o 1 de xaneiro de 2023, e valora positivamente que se fomente a evolución cara as emisións en alta definición.
Porén, a CNMC cuestiona que se estableza unha data fixa para dito cese, e recomenda que se valore, xunto cos radiodifusores do sinal de televisión, cal sería o escenario adecuado; fixar unha data concreta ou permitir que cada radiodifusor determine libremente a data na que realizaría o cambio das súas emisións á alta definición.
Para mais información:
Proposta de ampliación do prazo para a finalización das emisións de TDT con calidade SD.
26/07/2022 – O Ministerio de Asuntos Económicos e Transformación Dixital, a través da Secretaría de Estado de Telecomunicacións e Infraestruturas Dixitais, ven de iniciar a tramitación da modificación do Real Decreto 391/2019, de 21 de xuño, polo que se aproba o Plan Técnico Nacional da Televisión Dixital Terrestre e se regulan determinados aspectos para a liberación do segundo dividendo dixital, mediante a publicación para audiencia e información pública do proxecto de Orde para realizar dita modificación.
O Real Decreto 391/2019, dispuxo unha limitación temporal á emisión das canles de televisión en definición estandar. Segundo este, a data límite para a emisión con esta resolución é o 1 de xaneiro de 2023. A partir desa data, a emisión do sinal da TDT debería ser en alta definición (HD).
O obxectivo da Orde para a modificación deste Real Decreto é pospoñer a data de fin do cese obrigatorio para as emisión da televisión dixital terrestre en definición estandar ata o 14 de febreiro de 2024.
O Ministerio pon a disposición un espazo para a participación pública a través do cal se poderán presentar aportacións, no marco deste trámite, ata o 4 de agosto de 2022.
Para mais información pode consultar o seguinte enlace:
RTVE lanza un comunicado no que se posiciona sobre a continuidade da televisión gratuíta e de libre acceso.
16/06/2022: Radiotelevisión Española é membro do grupo “Television abierta”, conformado polos principais axentes da Televisión Dixital Terrestre (TDT) en España, cuxa principal motivación é contribuír ao impulso da televisión de acceso universal, libre e gratuíto. Neste sentido, RTVE publicou un comunicado na súa páxina web a través do que se une á petición do grupo pola continuidade do acceso libre e gratuíto da TDT.
Na actualidade a TDT utiliza a banda de frecuencias que vai de 470 a 694 MHZ, sub700MHz, e o uso desta banda está blindada para o servizo de televisión terrestre ata o 2030. Así, durante os próximos 8 anos, a actual TDT ten garantida a súa emisión.
Non obstante, no 2023 producirase a seguinte Conferencia Mundial de Radiocomunicacións (CMR-23). Nestas conferencias, reúnense os gobernos, os organismos reguladores e a industria para actualizar o regulamento de Radiocomunicacións da Unión Internacional de Telecomunicacións. Na CMR-23 está previsto que se traten temas que poden afectar directamente á TDT, como a liberación de mais frecuencias da banda que está a utilizar para outros usos, ou mesmo a desaparición total da TDT, co que, tal e como defende RTVE, débese preservar dita banda para que a TDT garanta un acceso universal, libre e gratuíto dos cidadáns españois á televisión, sen alterar a competencia existente no sector audiovisual e a propia produción española de contidos.
Fonte: www.rtve.es/rtve